Ny Ministeran’ny Tanora sy ny Fanatanjahantena dia manome lanja ny fahasalamana sy ny fiarovana ny tanora malagasy. Ho fampiharana izany, ny Fitaleavana misahana ny Fahasalamana Ara-pananahana sy ny Fiarovana ny Tanora (DSRPJ) dia nanatanteraka fiofanana momba ny fanabeazana ara-pananahana ho an’ny tanora, hanampiana azy ireo hiatrika ny fiainana sy hiaro tena amin’ny aretina azo avy amin’ny firaisana ara-nofo ary ny vohoka aloha loatra.
Tanora sy zatovo 500 no nisitraka ny fiofanana manerana ny faritra Antananarivo I, III, IV, Mahajanga, Ambondromamy, Boriziny ary Antsohihy. Nitohy tamin’ny fanentanana, fanoroan-kevitra ary fanomezana tolotra maimaim-poana toy ny fandrindram-piterahana izany.
Nisy ihany koa ny fitiliana Syphilis sy VIH/Sida, niarahana tamin’ny Ministeran’ny Fahasalamana, ny CUA ary ny LABIS, ary ny fikambanan’ny mpianatra FIMPIDIANA sy FITENOTA ao Ankatso.
Tamin’ny ankapobeny, zatovo 4506 no voahentan’ny hetsika, 325 no nisitraka fitiliana, 195 no nahazo tolotra fandrindram-piterahana ary 207 no nahazo torohevitra manokana.
Hotohizana manerana ny faritra ny hetsika rehefa vita ny fandrindrana miaraka amin’ireo tompon’andraikitra rehetra voakasika.